“Sekretet”, reagon Ina Rama

Në kohën kur mazhoranca akuzon Prokurorinë e Përgjithshme për nxjerrje sekreti hetimor, organi qendror i akuzës përmes një deklarate zyrtare njofton opinionin publik se Prokuroria gjatë kryerjes së veprimeve hetimore bashkëpunon edhe me institucione të tjera, sikurse Policia e Shtetit, ekspertë të kriminalistikës apo mjekësisë ligjore.

Në vijim në deklaratë thuhet se në asnjë rast kur të dhënat e hetimit kanë qenë të administruara nga prokurorët apo oficerët gjyqësorë të çështjes nuk ka ndodhur të ketë rrjedhje informacioni, duke dhënë të kuptohet se mund të kenë qenë të tjerë institucione që kanë nxjerrë sekretet në media.

Sipas zyrës së shtypit, Prokuroria ka ndjekur me profesionalizëm hetimet për të gjitha rrethanat dhe pistat e hetimit për ngjarjet e 21 janarit.

“Përsa i përket publikimit të kërkesës së bërë nga institucioni i Prokurorisë ndaj Kuvendit të Shqipërisë për autorizimin për proçedim ndaj dy deputetëve, Z. Ilir Meta dhe Z. Dritan Prifti, sqarojmë se pavarësisht se nuk janë akte që mbrohen nga sekreti hetimor, është vlerësuar nga ana jonë se informimi i publikut me këtë këtë fakt, mund të menaxhohej nga ana e Kuvendit të Shqipërisë”, vijon deklarata.

“Dokumentet e kësaj çështjeje si dhe ekspertiza filmike ndodhen prej kohësh në dispozicion të Prokurorisë dhe në asnjë rast nuk kanë dalë në media informacion mbi to”, thuhet në deklaratën e Prokurorisë.